Ridetu

Ridetu

El diversaj tirkestoj

Iras ebria Fonfaro sur strato. Foje li ekridas, foje li mansvingas. Fine aliras lin ia tipo kaj demandas:

– Kial vi tiel ridas?

– Mi rakontas al mi ŝercojn.

– Kaj kial vi mansvingas?

– Ĉar iujn mi jam konas.

*

– Kion vi faras tie en la koruso-provoj?

– Ni trinkas vodkon kaj kartludas.

– Do kiam vi kantas?

– Kiam ni revenas hejmen!

*

Post unu studjaro alvenas hejmen studentino kaj de la sojlo vokas:

– Panjo, mi havas knabon!

– Bonege, filineto, kaj kie li studas?

– Sed, panjo, li havas nur du monatojn!

*

Edzino plendas al la edzo:

– Vi jam min ne amas. Estis tempo, kiam hejme vi ĉiam tenis miajn manojn.

– Jes, vere, sed antaŭe ni ankoraŭ havis hejme forte-pianon.

*

Ĉiuj volas vivi longe, sed neniu volas esti maljuna.