Numero 102 – decembro 2013
Antaŭvorto
Karaj Legantoj!
Se almenaŭ nur unu homo pro legado de la bulteno FRATECO fariĝus pli bona, tiam valorus dediĉi multan tempon por ĝin eldonadi. Sed estas la danĝero, ke multaj ĝin ne legas sed nur trarigardas serĉante ion novan, ne tra-dician. Tamen ĉio rapide malnoviĝas. Valoras do de tempo al tempo halti kaj pripensi: Kial mi rapidas? Kien mi ten-dencas? Ĉu mi vere laboras pri mi mem por fariĝi bona homo, vera kristano? La lingvo Esperanto povas iĝi bona rimedo kaj helpilo por homo serĉanta pacon kaj bonon kaj unuecon kun gefratoj kaj kun Dio.
Mi pensas, ke estas bone rememorigi la sentencon de Esperanto-Sekcio de KIK: „Ne ĉio, kion ni faras, estas la plej bona, ne ĉio estas tre saĝa, tamen en unu ni certas; ke oni devas labori kaj zorgi, ke post nia foriro restu surtere iom da bono. Jen nia simpla celo de nia agado per Espe-ranto”.
En ĉi tiu 102a numero de FRATECO vi povas legi pri la fruktodona vivo de sankta Faŭstina Kowalska kaj tiu de laborema samideanino Franciska Bardecka. Tio estu por ni la instigo por konvena utiligo de la surtera tempo, „ke post nia foriro restu surtere iom da bono”.
Atentan legadon, meditadon kaj pripensadon al ĉiuj legantoj deziras kaj salutas via redaktoro
- Stanisław Płachta OFM
Biskupice 47
42-436 PILICA
Mia retpoŝto: stanislawp@ofm.krakow.pl
